L'Appenzell dador è in chantun d'abitar ideal tranter il Lai da Constanza ed il Säntis e davant las portas da la citad da Sogn Gagl. Il pitschen chantun porscha ina gronda qualitad da viver a giuven e vegl. La cuntrada da collinas attractiva è caracterisada tras prads e tras guauds verds, tras vitgs intacts cun in'autonomia sauna e tras in abitadi lartg che resguarda er la natira. La vita en las 20 vischnancas pli grondas u pli pitschnas en la part davos, amez e davant è quieta e persunala, senza hectica urbana. Curt: Tgi che vul viver là, nua che auters sa recreeschan, è al dretg lieu en l'Appenzell dador.

Grazia a la structura economica diversifitgada datti ina purschida fitg vasta da plazzas da lavur qualifitgadas e da plazzas d'emprendissadi. Ultra d'intginas interpresas grondas datti numerus manaschis pitschens e mesauns, en ils quals la glieud da professiun bain scolada è gist uschè dumandada sco absolventas ed absolvents da scolas autas. Plinavant èn sa domiciliads adina dapli novs manaschis e novas firmas en il chantun, betg sco ultim pervia da l'imposiziun da taglia sin ils gudogns d'interpresa che importa mo 6 pertschient. L'Appenzell dador è uschia a la testa da questa categoria en l'Europa. La purschida da furmaziuns da scola ha in bun standard e cumpiglia la scolina, la scola populara e la scola chantunala. Las chasas da scola da l'Appenzell dador n'èn betg manaschis da massa, mabain instituts da furmaziun survesaivels, vivs e moderns.

Sin fundament da sia cuntrada, dentant er da sia cultura e da sia tradiziun variada è il chantun Appenzell dador in lieu ideal per giudair il temp liber e per sa recrear. Il chantun è in paradis per viandar cun numerusas rutas lungas e curtas sco er cun vias tematicas infurmativas.

Ina purschida da sanadad ritga e moderna è gist uschè preschenta sco ina retscha da bogns e da chasas da dimora che resguardan er las forzas da la natira. Ultra da la medischina da scola vegnan applitgadas er metodas da cura alternativas. Las curas alternativas vegnan garantidas tras la constituziun chantunala e confermadas tras la lescha da sanadad.

Da vegl ennà dispona l'Appenzell dador d'ina ritga vita culturala. La pictura purila, las isanzas e la musica populara vivan ed han fermas ragischs en il pievel, ed er l'art contemporan fa part da questa purschida. Differents museums e differentas bibliotecas porschan collecziuns attractivas per uras da paus e da recreaziun. La cultura è ina part dal mintgadi da l'Appenzell dador. Plinavant è l'Appenzell dador in lieu da retratga per bleras artistas e per blers artists. En quest lieu naschan chaussas nunconvenziunalas e da qua davent partan las artistas ed ils artists per il mund cultural. In renum mundial han ils "Niclads da Silvester" dal vegl di da Son Silvester ad Urnäsch. Persunas indigenas, turistas e turists sco er staziuns da televisiun internaziunalas accumpognan onn per onn il legher travasch ils 13 da schaner.

Dapi la separaziun da l'Appenzell dadens avant passa 400 onns è il chantun Appenzell dador in chantun independent. En las 20 vischnancas vivan stgars 53'000 dunnas, umens ed uffants. Schebain che quai n'è betg fixà en la constituziun, vala Herisau sco chapitala. Là sa chatta er la pli gronda part da l'administraziun chantunala. La cultura politica da l'Appenzell dador è caracterisada tras ina ferma posiziun da las ventg vischnancas. Tuttina ha il chantun surpiglià ils ultims onns pli e pli incumbensas che vegnivan ademplidas fin ussa da las vischnancas. A medem temp han las vischnancas rinforzà la collavuraziun vicendaivla. Ch'il chantun è uschè pitschen, ha la finala l'avantatg che tut è survesaivel e che las vias èn curtas, senza ina birocrazia exorbitanta.