Il chantun Uri è situà entamez in mund muntagnard genuin al lieu il pli vers sid dal Lai dals quatter chantuns. La Val da la Reuss sa tira dal Lai d'Uri fin a la planira auta d'Ursera, al pe dal Gottard. Fitg attractivas èn las valladas lateralas da l'Uri, il "Schächental", il "Erstfeldertal", il "Maderanertal", il "Meiental" ed il "Göscheneralptal". Grazia a las colliaziuns internaziunalas nord – sid da la viafier e da l'autostrada è l'Uri en ina situaziun privilegiada, quai che reguarda il traffic.

L'economia da l'Uri – ina maschaida interessanta da differentas branschas d'industria e da mastergn. Passa 2'000 manaschis occupan tranter 1 e stgars 1'000 collavuraturas e collavuraturs.

La pitga principala en questa regiun èn ils manaschis pitschens e mesauns. Els portan prestaziuns excellentas, spezialmain en l'industria principala e secundara da construcziun, en la construcziun da maschinas, en l'industria electrica, en la tecnologia da gumma e da materias sinteticas sco er en il turissem.

Ils patruns privats ils pli gronds èn la Dätwyler Svizra SA e la RUAG Components. Ils custs da salari ed ils custs accessorics ch'èn cumpatibels, la productivitad e la quota da dischoccupaziun minimala porschan las meglras premissas per in svilup cuntinuant e persistent da l'economia.

Tranter Erstfeld e Biasca construescha la AlpTransit Gotthard SA actualmain in tunnel da 57 kilometers, il tunnel il pli lung dal mund. Il project grond dal nov transit tras las Alps porta al chantun Uri lavur e progress economic. Aspects negativs che accumpognan quest svilup èn la chargia da traffic durant il temp da construcziun e la perdita terren culttovà.

La cuntrada da l'Uri ans surprenda adina puspè. Qua chattan ins rivas miaivlas al Lai d'Uri, bels vitgs en la vallada principala sco er en las valladas lateralas, sin ils auts surfatschas ennavadas solitaras e pizs da 3000 e passa meters sur mar.

Enturn il Lai d'Uri sa porscha in paradis cun pussaivladads da sport e d'aventuras. La "Via da la Svizra" enturn il lai d'Uri che mesira 35 kilometers (dal Rütli fin a Brunnen) è in'excursiun dumandada. Tipicas per l'Uri èn er las numerusas pendicularas, cun las qualas turistas e turists sco er persunas indigenas cuntanschan entaifer paucas minutas patgificamain ils culms suleglivs, las terrassas cun in panorama grondius ed ils pizs. Tar quest mund intact tutgan er l'alpegiaziun ed ina flora alpina unica. Products gustus natirals èn la noda-chasa da l'agricultura da l'Uri.

La Val d'Ursera cun Andermatt, Hospental e Realp è ina da las regiuns da la Svizra che pon garantir las meglras cundiziuns da naiv. Ils territoris da skis en il Schächental, sin il Gitschenen en l'Isental, sin la Haldi, sur Schattdorf e sin il Brüsti tar Attinghausen èn bain pitschens, ma bels. En blers restaurants ed en ustarias chattan ins sin la carta da menu tant spezialitads da l'Uri sco er creaziuns raffinadas da la cuschina d'emprima qualitad.

Vias, sendas e pass en tut las direcziuns han caracterisà l'istorgia da l'Uri. La punt vers sid ed en in auter territori cultural-linguistic ha laschà ses fastizs en l'Uri, saja quai en l'architectura, en la cultura culinarica ed en il mund da las ditgas e da las legendas. Gia Johann Wolfgang von Goethe ed il retg Ludiwig II da Baviera han descrit la fascinaziun da l'Uri sin lur viadis. Friedrich Schiller ha scrit il toc da "Wilhelm Tell", noss erox naziunal ch'è daventà uschia immortal.

Culturalmain porscha il chantun Uri diversas chaussas. Baselgias baroccas, numerusas chapellas, fortezzas e chastels stattan en differents lieus istorics. L'Uri sa distingua er tras in artisanadi activ e tras in ritg mund da cultura, da festivals e da teaters.

Cun 35'000 abitantas ed abitants tutga l'Uri tar ils chantuns cun ina pitschna populaziun. Sch'ins resguarda la surfatscha è l'Uri l'indeschavel chantun da la Svizra. Il traject dal Gottard da las viafiers federalas svizras, l'autostrada A2 cun ils dus lungs tunnels tras il Seelisberg e tras il Gottard, la via chantunala e las tschintg vias sur ils pass dal Klausen, da l'Alpsur, dal Gottard e dal Furca dattan al chantun Uri in access excellent.

L'administraziun da l'Uri sa distingua tras vias curtas e tras soluziuns pragmaticas. Uschia ha dumagnà il project turistic da l'Egipzian Samih Sawiris ad Andermatt il viadi tras ils impediments birocratics sin il stgalim chantunal e communal en in temp da record. Igl è previs da cumenzar cun sia construcziun l'onn 2009.

L'Uri vul introducir l'onn 2009 ina lescha da taglia tenor il model flat-rate-tax. Questa introducziun ha tratg l'attenziun da l'entira naziun gia il cumenzament da la perioda da consultaziun.