Il traffic public en Svizra

Tge meds da transport publics datti en Svizra?

La rait dal traffic public è sviluppada fitg bain en Svizra e sa cumpona da plirs elements:

Ils trens giogan ina rolla centrala: las Svizras ed ils Svizzers èn campiuns europeics areguard ils kilometers fatgs per abitant.
Er ils trams e bus èn da grond’impurtanza, cunzunt per il traffic urban e regiunal.
Las pendicularas èn in trumf irremplazzabel per la purschida turistica da las regiuns muntagnardas.
Ils bastiments da lingia sin ils lais e flums cumpletteschan il sistem dal traffic public.

I dat varga 250 interpresas da transport public en Svizra e 20 cuminanzas da tariffa. La Confederaziun, ils chantuns e las vischnancas subvenziuneschan il traffic public. Las interpresas da transport fixeschan sezzas las tariffas dals bigliets ed abunaments en il rom da l’organisaziun Alliance SwissPass.

Co viagiar cun il traffic public?

1 viadi = 1 bigliet

En Svizra pudais Vus prender in bigliet per l’entir viadi fin a Vossa staziun finala, er sche Vus duvrais ils meds da transport da pliras interpresas differentas e sche Voss traject cumbinescha tren, bus, tram e bastiment.

Nua cumprar in bigliet?

Vus pudais cumprar Voss bigliet tar las Viafiers federalas svizras (VFF), in’autra interpresa da transport u ina cuminanza da tariffa. Vus pudais far quai

al spurtegl,
a l’automat,
en l’internet,
cun in’app (p.ex. VFF u FAIRTIQ).

Co viagiar damain char?

Vus pudais profitar da numerus abunaments dal traffic public. Tranter quests offrescha l’abunament da mesa taxa ina reducziun da 50% sin ils bigliets e las cartas dal di.

Sche Vus cumprais Voss bigliet online (internet, app) ed ordavant, pudais Vus profitar d’offertas da spargn:

bigliets da spargn vegnan proponids per tscherts trajects. Ma adatg, quels èn be valaivels en il tren, per il qual Vus avais cumprà il bigliet.
cartas dal di da spargn.

I dat diversas autras offertas avantagiusas, numnadamain per giuvenils e gruppas.

Cun ni senza reservaziun?

Er sin las grondas lingias n’è la reservaziun betg necessaria per trens svizzers. Ella è dentant obligatorica per ils trens turistics sco il Glacier Express u il Bernina Express.

In bigliet per il velo?

As infurmai, sche Vus viagiais cun in velo. Ultra d’in bigliet per Voss velo, duvrais Vus er ina reservaziun sin tscherts trajects. Sche Vus vulais viagiar senza problems, pudais Vus er eleger la spediziun da bagascha.

In bigliet per il chaun?

Sche Vus viagiais cun in chaun ch’è pli pitschen che 30 cm d’autezza, dastga el viagiar gratuit cun tren en in chanaster u chaset. Animals pli gronds ston avair in bigliet da 2. classa a mesa taxa per il tren. Vus pudais medemamain cumprar ina carta dal di, in abunament mensil u annual per Voss chaun.

Tschertas interpresas da transport prevesan in transport gratuit per tut ils chauns. As infurmai avant che Vus As mettais sin viadi.

Viagiar cun uffants

Viagiar senza barrieras

Be ina part dal traffic public è accessibla en moda autonoma a persunas cun mobilitad restrenschida. Las persunas cun impediments pon reservar in agid gratuit per entrar e sortir u in servetsch da transport tar la proxima fermada u staziun accessibla.

Il Contact Center Handicap permetta a Vus da reservar ils servetschs d’assistenza per tut ils meds da transport publics online u per telefon sin il numer gratuit 0800 007 102 (da las 5:00 fin las 24:00). Il Contact Center Handicap coordinescha er l’assistenza per ils viadis a l’exteriur. Attenziun als termins da disditga.

Vus pudais verifitgar l’accessibladad da las staziuns e da las fermadas da bus svizras sin la carta per las persunas cun mobilitad restrenschida.

Tge far en cas d’interrupziuns dal traffic?

Interrupziuns da la rait da traffic vegnan annunziadas en temp real sin l’urari online da las VFF, sin las apps dals transports publics u sin staziun. Vus pudais verifitgar la situaziun dal traffic e las interrupziuns da la rait da viafier sin la pagina d’internet u l’app da las VFF.

Chaumas èn fitg raras en Svizra. Voss traject po dentant esser pertutgà d’ina chauma a l’exteriur. Per il traffic transcunfinal mettan las VFF en general a disposiziun trens da substituziun sin ils trajects svizzers.

Sche Vus avais almain in’ura retard tar l’arriv, avais Vus il dretg d’ina indemnisaziun. Alliance SwissPass As explitgescha Voss dretgs en cas da retard e co obtegnair in rembursament.

Per savair dapli

Vus pudais verifitgar ils uraris, cumprar in bigliet (er in bigliet a pretsch reducì) ed As infurmar davart eventualas interrupziuns da la rait sin la pagina d’internet u l’app da las VFF.
Vus pudais As infurmar davart las cartas dal di da spargn.
I dat numerus abunaments dal traffic public.
Scuvri la carta Junior (per ils geniturs) u la carta Uffant accumpagnà.
As infurmai, sche Vus viagiais cun in velo.
Vus pudais consegnar bagascha.
I dat differents bigliets per viagiar cun in chaun.
En tscherts cas pudais Vus obtegnair in’indemnisaziun en cas da retard.
Vus pudais consultar il Servetsch da mediaziun dal traffic public en cas da conflicts cun in’interpresa da transport.
Sche Vus avais basegn d’ina prestaziun d’assistenza per in transport public, savais Vus contactar il Contact Center Handicap.
Vus pudais verifitgar l’accessibladad da las staziuns e fermadas svizras sin la carta per persunas cun mobilitad restrenschida.

Tschertga

Il traffic public