Quints betg pajads e taglias betg pajadas, in cumportament da consum e da cumpra betg controllà, contracts da cumpra cun pajaments en ratas e credits èn ils motivs ils pli impurtants per ina surdebitaziun. In eveniment nunprevis po metter sutsura la planisaziun finanziala cun tschains e cun ratas da rembursament. Avant che prender si in credit pitschen vegni recumandà fermamain da far in preventiv a lunga vista cun bunas reservas. Augments dal credit levgeschan il squitsch mo a curta vista, ils tschains e las ratas da rembursament creschan dentant anc pli fitg.
En cas d'ina surdebitaziun ston persunas estras quintar cun consequenzas negativas, per exempel che lur permissiun da dimora na vegn betg prolungada.

Per betg laschar vegnir memia gronds ils debits, duess ins dumandar l'agid d'ina cussegliaziun da debits professiunala. En blers chantuns datti posts da cussegliaziun da debits d'utilitad publica. Servetschs socials da las vischnancas u da la baselgia èn ulterius posts da consultaziun. La cussegliaziun da debits emprova dad obtegnair la survista da la situaziun finanziala e dad elavurar in preventiv per la sanaziun. Ella sa metta en contact cun las credituras u cun ils crediturs e dumonda quels da suspender il termin da pajament dals debits durant la fasa da scleriment.

Plusminus è in post d'infurmaziun, da prevenziun e da cussegliaziun (da Basilea) che gida en cas da problems cun daners e cun finanzas stgarsas. Plusminus s'engascha per che la gronda part da la populaziun s'occupia a temp cun il preventiv e cun dumondas da daners, avant ch'i dettia ina surdebitaziun. Plusminus na porscha betg mo infurmaziuns cumplessivas, cussegliaziuns, tips da cumportament ed adressas, mabain er models da brevs ch'èn drizzadas ad uffizis da scussiun, a credituras u a crediturs.

MAX.MONEY è ina campagna naziunala da tschintg onns davart il tema "giuventetgna e daners". Plusminus, la cussegliaziun da preventiv e da debits da Basilea ed organisaziuns partenarias han lantschà questa campagna.