Ils signals radiofonics per GMS sa chattan en ils bindels da frequenza da 900 MHz (GSM 900) fin 1800 MHz (GSM 1800), tals per UMTS en il bindel da frequenza da 2 GHz. Perquai ch'il telefon mobil vegn tegnì directamain a l'ureglia, è la radiaziun pli gronda che tar antennas (staziuns da basa).

Er sch'i n'è betg sclerì scientificamain en moda definitiva, sche e – sche gea – en tge dimensiun che la radiaziun dals telefons mobils donnegian la sanadad, vegn recumandà da tegnair la chargia uschè bassa sco pussaivel. Tar la cumpra duess ins perquai guardar sin apparats cun ina pitschna radiaziun, far telefons curts, trametter ina communicaziun en furma da text (SMS) u duvrar – en cas d'in diever frequent – in indriz per telefonar a maun liber. Infurmaziuns detagliadas dat la broschura davart la radiaziun e la sanadad da l'uffizi federal da sanitad (UFS) e da l'uffizi federal d'ambient, guaud e cuntrada (UFAGC).

La radiaziun da staziuns da basa dependa da lur prestaziun d'emissiun, da la distanza tar l'antenna, da l'orientaziun da l'antenna sco er dals conturns. Sin la charta da survista da l'uffizi federal da communicaziun (UFCOM) che vegn actualisada mintga duas emnas èn registrads ils lieus da las staziuns da radiodiffusiun (radio e televisiun) e da las staziuns da basa da GSM e dad UMTS (telefonia mobila). Per mintga lieu dals emetturs da radio e da televisiun vegnan inditgads ils programs emess e las frequenzas, per las staziuns da basa da la telefonia mobila vegn inditgada la dimensiun da la prestaziun eradiada. Infurmaziuns pli detagliadas davart in singul implant pon vegnir dumandadas tar las autoritads ch'èn cumpetentas per la protecziun da l'ambient en il chantun u en la vischnanca.