Ultra da controllar la confidenza e da resguardar quai ch'è stampà pitschen resp. las cundiziuns generalas da fatschenta duess vegnir controllà il pretsch da cumpra (incl. custs supplementars). Igl è bun da controllar eventuals dretgs da restituziun e da pajar – sche pussaivel – pir suenter ch'ins ha survegnì la rauba. Tar martgads online vali la paina da studegiar las infurmaziuns davart la protecziun da las cumpradras e dals cumpraders e davart il servetsch fiduziar.

Persunas minorennas na pon da princip far nagins contracts senza il consentiment dals geniturs. Sch'ils geniturs stattan silenzius, poi vegnir supponì ch'els dettian lur consentiment. Sche geniturs respectivamain las represchentantas legalas u ils represchentants legals da las persunas minorennas na van betg d'accord cun ina cumpra, ston els annunziar quai immediatamain a la part contrahenta. Tras questa annunzia vegn il contract resguardà sco nunvalaivel.

La ristga tar il pajament cun la carta da credit è circa medem gronda sco en ina fatschenta u en in restaurant. En cas d'in abus sto la commerzianta u il commerziant furnir la cumprova. Tuttina èsi bun da verifitgar l'enconuschientscha e la seriusadad da la commerzianta u dal commerziant sco er da controllar regularmain ils rendaquints da la societad da cartas da credit. Sin las paginas d'internet da l'uffizi federal per dumondas dal consum As stattan a disposiziun differents links e tips e differentas infurmaziuns.

L'uffizi federal per dumondas dal consum metta a disposiziun sin sias paginas d'internet differents links e tips e differentas infurmaziuns davart il cumportament, sch'ins fa cumpras en l'internet.