L'agid ambulant per persunas dependentas porscha assistenza e cussegliaziun per umans periclitads da dependenza e dependents sco er per lur confamigliaras e per lur confamigliars. E cas da difficultads cun alcohol, cun medicaments, cun tubac, cun gieus da fortuna u cun auters meds che chaschunan ina dependenza pudais Vus As drizzar als posts da cussegliaziun correspundents en la regiun.

Las instituziuns da l'agid staziunar per persunas dependentas tractan umans dependents (dischintoxicaziun corporala, tgira posteriura e.u.v.). Davart plazzas da terapia staziunaras pudais Vus As infurmar tar Vossa vischnanca u tar Voss chantun. Il center svizzer da coordinaziun per purschidas staziunaras da terapia (COSTE) metta a disposiziun sin sia pagina d'internet ina banca da datas davart la purschida da plazzas da terapia.

La pagina d'internet dad infoset gruppescha ina massa infurmaziuns davart las differentas furmas da dependenza, davart federaziuns spezialisadas, davart posts da consultaziun e.u.v.

L'uffizi federal da sanadad publica (UFSP) lantschescha campagnas naziunalas da prevenziun cunter l'alcohol, cunter il tubac e cunter las drogas. Quellas vegnan realisadas da divers projects chantunals e communals. Ultra da quai datti posts spezialisads per la prevenziun en Vossa regiun.

As infurmai ultra da quai davart las leschas concernent l'alcohol, concernent il tubac (p.ex. consegna ad uffants ed agiuvenils, scumonds da far reclama) e concernent drogas illegalas. Las paginas d'internet dal UFSP porschan infurmaziuns correspundentas.

Umens e dunnas han in depurtament different areguard las drogas (motivs dal svilup da la dependenza, muster da consum, mintgadi da la persuna che consumescha drogas, sortida e.u.v.). Pervi da quai è impurtanta ina lavur da drogas che dependa da la schlattaina. Il UFSP sustegna las lavurs da perscrutaziun correspundentas sco er la realisaziun en la pratica da las enconuschientschas scientificas. Sin la pagina d'internet dal UFSP chattais Vus ulteriuras infurmaziuns e links correspundents. La pagina d'internet da drugsandgender.ch porscha ina glista da las purschidas da l'agid en cas da dependenza adattadas per dunnas. La glista vegn amplifitgada permanentamain e duai cuntegnair en l'avegnir er purschidas adattadas per umens.