L'organisaziun, las prestaziuns ed ils custs da viver en ina chasa da persunas attempadas e da tgira varieschan d'ina instituziun a l'autra. Sco alternativa datti sin plaun regiunal er abitaziuns da tgira. En quellas abitescha ina pitschna gruppa da senioras e da seniors sco cuminanza da vegliadetgna e vegn tgirada ed assistida di e notg da persunal da tgira spezialisà.

Da princip decida la persuna attempada – savens ensemen cun sia famiglia –, sch'ella vul ir en ina chasa da persunas attempadas e da tgira; ella fa alura er il contract cun la chasa. Sche la persuna attempada n'è betg pli en cas da dar ses consentiment u sch'ella refusa d'entrar en ina chasa da persunas attempadas e da tgira malgrà ch'ella n'è betg pli abla da viver suletta, duess ins sa drizzar a l'autoritad tutelara da ses lieu da domicil, per che quella examineschia la situaziun e decidia davart l'entrada. En en cas d'urgenza po er ina media u in medi ordinar ina collocaziun temporara.

Avant che sa decider duess ins – sche pussaivel – ir a guardar differentas chasas da persunas attempadas e da tgira e s'infurmar tar la direcziun davart las relaziuns d'abitar, davart la taxa da tgira, davart la purschida d'activitads, davart il decurs dal di e davart las pussaivladads da metter atgnas mobiglias u objects persunals en la chombra. La vischnanca u ils posts chantunals sco er ils posts da cussegliaziun da la Pro senectute infurmeschan davart las differentas instituziuns en l'atgna regiun.

Ils custs per la tgira da persunas malsaunas entaifer ina chasa da persunas attempadas e da tgira vegnan da princip surpigliads da la cassa da malsauns. Per questas prestaziuns da tgira pajan las assicuranzas da malsauns pauschalas. Ils custs da tgira che surpassan la pauschala sco er autras prestaziuns – sco servetschs d'accumpagnament, pasts ed occupaziuns dal temp liber – van a quint da las abitantas e dals abitants. Sche las entradas d'ina persuna attempada na bastan betg per finanziar sia dimora en ina chasa da persunas attempadas e da tgira, po ella dumandar prestaziuns supplementaras. Per part e sut tschertas cundiziuns pajan ils chantuns e/u las vischnancas contribuziuns supplementaras a las abitantas ed als abitants sco er a chasas che adempleschan tscherts criteris da qualitad.

Infurmaziuns davart la finanziaziun dals custs da viver en ina chasa da persunas attempadas e da tgira dattan l'atgna vischnanca, la direcziun da la chasa sco er l'atgna cassa da malsauns. La dumonda per prestaziuns supplementaras sto dentant vegnir inoltrada a l'agentura communala da la AVS dal lieu da domicil.